Yule mwanamke mwingine niliyemwita "Mama"

Nimechochewa kuandika makala haya kufuatia habari alizoandika WM kumhusu mamake siku chache zilizopita......na pia Bi. AK kumhusu mmoja wa wahadhiri wake chuoni.....ni kuhusu mwanamke niliyempoteza kwa ugonjwa wa saratani mwanzo sana katika maisha yangu, lakini pia mtu ambaye kwangu mguso wake umedumu hata sasa.

Nilikutana na Bi. R wakati wa muhula wangu wa kwanza katika shule ya msingi.
Ingawa alikuwa amezeeka, alikuwa mchangamfu na kuniondolea wasiwasi wangu pindi tu aliponitazama.
"Mwanangu, natumai unatambua kuwa itatubidi tuwe marafiki kwa vile wazee wako wamekuweka chini ya utunzi wangu kwa muda wa miaka mitatu ijayo," aliniambia huku akitabasamu.
Na hapo basi pakaanza uhusiano wa kusisimua kati yetu.
Muroma kigogo huku akifunza katika shule iliyoshinikizwa na Uroma mwingi, hakuwahi kutumia nafasi hiyo kutuelekeza sisi (wanafunzi wake) hadi Roma; Waprotestanti kama mimi tulikuwa na wakati mzuri sana chini yake katika elimu ya dini, somo lilikuwa ni kumhusu Yesu aliyesulubiwa na kufufuka tu la sivyo halikuwa somo hata kidogo.
Huo, nafikiri, ndio ulikuwa mojawapo ya michango yake muhimu zaidi maishani mwangu kwa sababu sikuwahi kupata elimu bora ya dini sawia na hiyo kwa muda wangu wote katika elimu ya msingi.
Ninashukuru kwa sababu hakuruhusu tofauti zetu za kidhehebu kumchafua Yesu ambaye sote tulimwamini kwa imani na ari ya kudumu.
Mchango wake wa pili ulikuwa ni katika lile pendo lake la mama kwangu katika darasa lake kubwa.
Pengine sikuweza kuliona hilo zaidi ya pale nilipougua darasani wakati mmoja na pale vipusa fulani walijaribu kunitatiza wakati wa somo lake la hesabu.
Kwa ule ugonjwa, alifupisha kipindi hicho (kitendo hatari katika enzi hizo za kutoaminiana nchini Kenya) na kutuma mamangu aitwe kilomita 10 toka hapo; kitendo chake kilinigusa kiasi cha kutaka nipone upesi ili nimrejelee (wajua mamangu hangesikiza porojo za aina hiyo toka kwangu).
Kwa wale vipusa, barua ya mapenzi walokuwa wakinirushia ilianguka juu ya dawati lake...dada aliyekuwa ameiandika alitaka kuiaga dunia wakati ule ule.
Bi. R aliifungua barua hiyo na kuisoma kwa ugumu wa lugha alokuwa nao dada huyo, akamtazama na dada wenzake, na kisha kwa upole akasema: "Wavulana wangu na wasichana wapendwa, hebu tuyashughulikie haya wakati wa kipindi cha mapumziko."
Kipindi hicho kilipofika, Bi. R akatupa sisi (wengi wetu tukiwa wa umri wa miaka tisa hivi) elimu ya uzazi....yule dada hakunisumbua tena.
Siwakumbuki walimu wengine wakifanya alofanya Bi. R kwa muda wote nilopitia shule ya msingi na ya upili; ninachokumbuka badala yake ni maisha mengi yaliyoharibiwa na kupotezwa kuotokana na kupe walowezi wa kimapenzi tulowaita waalimu wetu.
Pengine ni muhimu nitaje kuwa ni chini ya ualimu wake Bi. R ndipo niliwahi kuwa na alama za juu zaidi katika somo la hesabu; hiyo ilikuwa ni kabla ya mimi kukutana na waalimu wengine walonisadikisha kuwa hesabu ni kisirani cha ubongo kwa wanafunzi.
Mchango wake wa tatu maishani mwangu ulikuwa kupitia elimu, - ni kwake nimepata kiu kikubwa cha ufahamu wa mambo, ujuzi wa kutumia ufahamu huo na maadili yanayostahili kuambatana na hayo yote; amenipa mimi na kila mmoja darasani mwake yaliyo bora zaidi toka kwake.
Alitufunza vema kiasi cha sisi kufanya vema katika mitihani pia; mojawapo ya ngano zinazohadithiwa sana huko hata sasa ni kuhusu ushindani mkubwa uliyojitokeza kati ya familia mbalimbali sehemu hiyo kutokana na wanafunzi wa Bi. R (darasa mkondo wa Mashariki) na wale wa Bi. T (darasa mkondo wa Magharibi) kushindana vikali.
Kutokana na bidii yake, mwenzenu niliwahi kujipata katika ushindani huo si mara moja.....baadhi ya rekodi nilizohusika nazo katika baadhi ya masomo alohusika nayo napashwa bado hazijavunjwa.
Licha ya hayo yote, Bi. R aliiaga dunia kutokana na ugonjwa wa saratani ambao wengi wetu hatukujua alikuwa nao hata tulipokuwa tukisherehekea kwingia kwetu kwenye shule ya upili; bila ya shaka ule ugumu wake wa kishujaa ulikuwa umetunyima mpenyo katika maisha yake na uchungu alokuwa amevumilia muda huo wote.
Kwa wengi wetu ambao alikuwa ameishi kama mama mzazi, tulikuwa tumepoteza zaidi ya mwalimu. Kumbukumbu yake ingali mbichi kwangu na yote alonifunza nayakumbuka hata sasa; nilifunza baadhi ya masomo niliyomshabikia na kufurahi naye katika mojawapo ya shule za msingi baada ya elimu yangu ya shule ya upili kwa heshima tu ya mwalimu wa muda ambaye Bi. R alikuwa amejenga ndani yangu.
Ninapotafakari kitambo hiki, nadhani mwanafunzi aliyekuwa ndani yangu alimshabikia Bi. R sana kiasi cha kusahau kumpa chochote kwa shukrani, hata pendo tu, - pendo ambalo pengine alistahili zaidi muda huo wote alipokuwa akitufunza.
Lakini kwa vile wanafunzi wake siku hizi ndio wanaoitetemesha nchi yetu na bara la Afrika, nachelea kusema Bi. R hajapata shukrani alostahili muda ambao umezidi bidii yake kubwa iliyolipwa na pato dogo toka kwa serikali (hali ambayo walimu wengine wengi yabidi wavumilie hata wa leo).
*Makala haya yalikuwa tayari lakini yalicheleweshwa kidogo kwa ajili ya mjadala ambao ulikuwa ukiendelea kuhusu Wakristo na maswala ya kitaifa nchini Kenya. Mjadala huo utaendelea Jumatano hivi baada ya makala mengine kumhusu mwanamuziki Elvis Presley.
- Z.M, Mhariri wa muda (Guest Editor).