Ndugu Watanzania, ni kweli haya au masihara tu?

Ndugu zangu Watanzania, historia yenu kama taifa ni mojawapo ya chache ninazoheshimu barani mwetu humu na zaidi pia katika eneo la Afrika ya Mashariki.

Historia ya mwanzilishi wa taifa lenu, hayati Mwalimu Julius Nyerere pia ipo pale juu katika orodha ya zile ninazoheshimu barani, - haswa zile zinazowahusu watu binafsi.

Nimefuatilia kwa karibu namna mumehishimu mchango wa Mwalimu kwa maisha ya taifa lenu kitambo kirefu na nimependezwa pia na heshima mliyompa maishani na hata mautini.

Ila ripoti hii niliyoisoma katika mojawapo ya magazeti maarufu nchini Kenya imenitia tumbo joto kidogo; hivi sielewi iwapo mnamuenzi Mwalimu kupita kiasi.

Sijui - pengine nakosea - ila maoni yangu ni kuwa mlikuwa mumemuenzi vya kutosha hata kabla ya mradi huu mpya kumhusu.

Na siyo eti nawatilia kijicho kwa mema alowatendea au msingi alowawekea kama taifa ikilinganishwa na waasisi wengine wa mataifa ya Afrika; ni kwa ajili ya hofu na mashaka tu alo nayo Mkristo na Mwafrika kama mimi.